Goiza Euskadiko herri kirolak ezagutzera emateko erabili dugu. Soka tira, lokotsak, txingak, makilak bira eta beste hainbat froga egin ditugu lehiaketan zehar. Kuriosoa izan da txekiar eta poloniarrak gorri gorri ikustea, soka apurtzeko zorian.

Arratsaldean Bilbo bisitatzera eraman ditugu lehenengoz. Bisita gidatua izan dugu, Bilboren historiari buruz zerbait jakiteko. Etxebarria parketik hasita, hiriaren ikuspegi ederra izan dugu. Ondoren, San Antongo zubira joan gara eta Bilboren fundazioari buruzko hainbat xehetasun eman dizkigute: 700 urte atzera egin ditugu, XIV. mendeko zazpi kaleak nolakoak ziren irudikatuz. Bisitarekin bukatzeko, denbora librea izan dugu erosketak egin eta pintxoak dastatzeko!

Egunari bukaera eman diogu gynkana bat eginez, elkarlanaren bitartez froga guztiak arrakastaz gainditu ditugu. Ohera aurretik, erlaxazio ariketak egin ditugu.

Beranduago jaiki gara gaur, hemengo ohitura denez! Poloniarrak mezetara joan dira eta eskolan geratu garenok hainbat joku egin ditugu gorputza mugitzeko, zelai errearekin oso lehiakor ibili dira txekiarrak.

Arratsaldean eztabaidarako tartea izan dugu, World Café deituriko dinamika baten bitartez gai desberdinak landu ditugu gazteon gorabeheren inguruko iritziak trukatzeko. Lagunei buruz, harremanei buruz, errutinei buruz eta drogen kontsumoaren inguruan berba egin dugu besteak beste. Konturatu gara herrialde desberdinetan adostasun ugari eta baita desberdintasun batzuk ditugula.

Gaur hiltzailea akusatu dute eta epaiketa egin dugu. Dorota poloniar irakaslea errudun aurkitu du epaileak eta jokuari berriro ekin diogu. Eguna bukatu dugu denon artean dantza eginez, benetan gau izerditsua eta alaia gaurkoa!

Gaur goizean, alde batetik, Gernikako Bake Museoa bisitatu dugu, bertan, Gernikako bonbardaketaren inguruko hainbat aitorpen eta gertakizun ezagutu ditugu, eta bestetik, Bizkaiko Batzar Nagusietara joan gara, Gernikako arbolari arreta berezia eskainiz, antzina bizkaiko jaunak bertan biltzen baitziren. Poloniarrak, bereziki, hunkitu egin dira, haien testuinguru historikoarekin antzekotasunak direla eta.

Horren ostean, 12ak inguru, San Juan de Gaztelugatxe uhartera abiatu gara,

espero ez genuen ibilbide luze bat eginez. Txekiarrek eta poloniarrek, ez zituzten 260 espaloi espero, eta txiki-txiki eginda heldu dira elizara. Hala ere, oso atsegina izan zaigu, eta argazki kamerek kea atera dute.

            Behin tontorrean, otordu merezi bat izan dugu patxada handiz, eta hau amaitu ondoren, bueltako bideari ekin diogu. Honako hau, luzea eta nekagarria izan da oso, izerditan blai iritsiz.

            Bertatik Bakioko hondartzaraino autobusa hartu dugu, eta bertan igaro dugu arratsaldea, bainuak hartuz, kartetan jolastuz eta eguzkia hartuz. Haietako batentzat, itsasoa ikusten zuen lehenengo aldia izan da. Gaurkoz nahikoa izan da: eguna pelikula batekin amaitu dugu.